སྦེད་པར་བྱེད་དོ། །བརྒྱད་གང་ཞེ་ན། འདི་ལྟ་སྟེ། གནོད་སྦྱིན་དཔའ་བོ་ཞེས་བྱ་བ་དང་། བརྟན་པོ་དང་། བདག་པོ་དང་། སྲེད་མེད་ཀྱི་བུའི་སྟོབས་དང་། སྤྱོད་པའི་བློ་གྲོས་དང་། ཐུབ་དཀའ་དང་། འཇིགས་སུ་རུང་བ་དང་། གནོད་སྦྱིན་ལག་བཟང་ཞེས་བྱ་བ་སྟེ། གནོད་སྦྱིན་བརྒྱད་པོ་དེ་དག་འོང་བར་བྱ་བའི་ཕྱིར་ཤིན་ཏུ་ཁྲུས་བྱ་བ་དང་། གོས་ཤིན་ཏུ་གཙང་མ་བགོ་བ་དང་། འཆག་སར་འགྲོ་བ་དང་། སེམས་ཅན་ཐམས་ཅད་ལ་ཞེ་འགྲས་པ་མེད་པའི་སེམས་སུ་བྱ། གཟུངས་ཀྱི་ཆོས་ཀྱི་རྣམ་གྲངས་འདི་ཡང་ཡིད་ལ་བྱས་ཏེ། དེ་ལྟར་བྱས་ན་དེ་ལ་གནོད་སྦྱིན་བརྒྱད་པོ་དེ་དག་མྱུར་དུ་བཞིན་སྟོན་པར་འགྱུར་རོ། །བྱང་ཆུབ་སེམས་དཔའ་སེམས་དཔའ་ཆེན་པོ་འདོད་པ་ན་སྤྱོད་པའི་ལྷ་རྣམས་ཀྱི་ནང་དུ་སྐྱེས་པ་བརྒྱད་པོ་འདི་དག་ཀྱང་དེ་ལ་སེམས་པར་འགྱུར་ཏེ། བརྒྱད་གང་ཞེ་ན། འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་སྣང་བྱེད་ཅེས་བྱ་བ་དང་། སྣང་བྱེད་དང་། ཤེས་རབ་འོད་དང་། ཉི་མའི་འོད་དང་། ཡང་དག་སྐུལ་བྱེད་དང་། བསམ་པ་ཐམས་ཅད་ཡོངས་སུ་རྫོགས་བྱེད་དང་། སྐར་མའི་རྒྱལ་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྤྱོད་པའི་བློ་གྲོས་ཞེས་བྱ་བ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱད་པོ་དེ་དག་དེས་གཟུངས་ཐོབ་པར་བྱ་བའི་ཕྱིར་མངོན་པར་བརྩོན་པར་འགྱུར་རོ། །གཟུངས་འདི་ལ་བརྩོན་པའི་བྱང་ཆུབ་སེམས་དཔའ་སེམས་དཔའ་ཆེན་པོས་ཀྱང་བདེན་པའི་དམ་བཅའ་བར་བྱའོ། །བྱས་པ་གཟོ་བ་དང་། བྱས་པ་ཚོར་བ་ཅན་དང་། ཆོས་འདོད་པ་དང་། ཆོས་ལ་དགའ་བ་དང་། ཟབ་མོའི་ཆོས་ལ་བཟོད་པ་མངོན་པར་བརྩོན་པར་བྱའོ། །བྱང་ཆུབ་སེམས་དཔའ་སེམས་དཔའ་ཆེན་པོ་གཟུངས་ལ་བརྩོན་པས་ཀུན་འགྱེད་བགོ་བཤའ་བྱེད་པའི་ངང་ཚུལ་ཅན་དུ་བྱ་སྟེ། དེས་ཇི་ལྟར་ཆུང་བ་དང་། ཇི་ལྟར་ཉུང་བ་ལས་ཀྱང་སྦྱིན་པ་སྦྱིན་པར་བྱ་ན་མང་པོ་ལས་ལྟ་སྨོས་ཀྱང་ཅི་དགོས།