ཤཱ་རིའི་བུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དཔལ་གྱི་གཟི་བརྗིད་རྒྱལ་པོ་ལྟ་བུ་དེ་ཡོངས་སུ་མྱ་ངན་ལས་འདའ་བའི་དུས་ཀྱི་ཚེ་འཁོར་ལོས་སྒྱུར་བའི་རྒྱལ་པོ་སྣང་བ་འཛིན་ཅེས་བྱ་བ་མིའི་དབང་པོ་རིན་པོ་ཆེ་སྣ་བདུན་དང་ལྡན་པ་ཞིག་བྱུང་ངོ་། །དེའི་བུ་ཡོན་ཏན་རིན་པོ་ཆེ་བསམ་གྱིས་མི་ཁྱབ་པའི་དཔལ་ཞེས་བྱ་བ་ཞིག་ཡོད་དེ། །དེ་སྐྱེས་ནས་ལོ་བཅུ་དྲུག་ལོན་པ་དང་། དེས་སྒོ་མཐའ་པས་སྒྲུབ་པའི་གཟུངས་ཀྱི་ཆོས་ཀྱི་རྣམ་གྲངས་འདི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དཔལ་གྱི་གཟི་བརྗིད་རྒྱལ་པོ་ལྟ་བུ་དེ་ལས་ཐོས་ཏེ། དེས་གཟུངས་འདི་ཐོས་མ་ཐག་ཏུ་ཐོབ་པར་བྱ་བའི་ཕྱིར་བརྩོན་པར་གྱུར་ཏོ། །དེ་ལོ་བདུན་ཁྲིར་རྨུགས་པ་དང་གཉིད་ཀྱིས་མ་བསྟེན་ཏོ། །ནོན་པར་མ་གྱུར་ཏོ། །དེ་ལན་འགའ་ཡང་རྒྱལ་སྲིད་ལ་དགའ་བའམ། ནོར་ལ་དགའ་བའམ། བདག་ལ་དགའ་བར་མ་གྱུར་ཏོ། །དེ་ལོ་བདུན་ཁྲིར་ལན་འགའ་ཡངས་ལ་གློས་མ་ཕབ་སྟེ། གཅིག་ཏུ་ངེས་པར་ནང་དུ་ཡང་དག་འཇོག་ལ་གནས་སོ། །སངས་རྒྱས་བྱེ་བ་ཕྲག་དགུ་བཅུ་ལས་ཆོས་བསྟན་པ་ཐོས་ཏེ། ཐོས་ནས་ཀྱང་ཉམས་སུ་བླངས་སོ། །ཐམས་ཅད་བཟུང་ངོ་། །གཟུངས་ཉམས་སུ་བླངས་ནས་ཀྱང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་དཔལ་གྱི་གཟི་བརྗིད་ཀྱི་རྒྱལ་པོ་ལྟ་བུ་དེ་ཉིད་ལས་རབ་ཏུ་བྱུང་ངོ་། །དེ་རབ་ཏུ་བྱུང་ནས་དེ་ལོ་དགུ་ཁྲི་འདས་པ་དང་། དེས་སྒོ་མཐའ་ཡས་པས་སྒྲུབ་པའི་གཟུངས་འདི་བསྒྲུབས་ཏེ། བསྒྲུབས་ནས་ཀྱང་སེམས་ཅན་རྣམས་ལ་རྒྱ་ཆེར་ཡང་དག་པར་བཤད་དོ། །དེས་ཚེ་གཅིག་པོ་དེ་ཉིད་ལ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡང་དག་པར་འཛིན་དུ་བཙུད་ཅིང་། །ཕྱིར་མི་ལྡོག་པའི་ས་ལ་བཀོད་པར་གྱུར་ཏོ། །ཤཱ་རིའི་བུ་འཁོར་དེ་ན་ཚོང་དཔོན་གྱི་བུ་ཟླ་བའི་ཏོག་ཅེས་བྱ་བ་ཞིག་ཡོད་དོ། །དེས་སྒོ་མཐའ་ཡས་པས་སྒྲུབ་པའི་གཟུངས་ཀྱི་ཆོས་ཀྱི་རྣམ་གྲངས་འདི་ཆོས་སྨྲ་བའི་དགེ་སློང་དེ་ལས་ཐོས་སོ།