རྣམ་པར་ཤེས་པ་མི་འཇུག་པ་དེ་ལ་ནི་ཡོངས་སུ་རྟོགས་པ་གང་གིས་ཚུལ་བཞིན་མ་ཡིན་པ་ཡིད་ལ་བྱེད་པར་འགྱུར་བའི་ཡོངས་སུ་རྟོག་པ་གང་ཡང་མེད་དོ། །ཚུལ་བཞིན་ཡིད་ལ་བྱེད་པ་ལ་རབ་ཏུ་བརྩོན་པ་དེ་ནི་མ་རིག་པ་ཀུན་ནས་སློང་བ་མི་བྱེད་དོ། །མ་རིག་པ་ཀུན་ནས་ལྡང་བ་མེད་པ་གང་ཡིན་པ་དེ་ནི་སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་སློང་བ་མེད་པ་ཡིན་ནོ། །སྲིད་པའི་ཡན་ལག་བཅུ་གཉིས་པོ་དག་གི་ཀུན་ནས་ལྡང་བ་མེད་པ་གང་ཡིན་པ་དེ་ནི་སྐྱེ་བ་མེད་པ་ཡིན་ནོ། །སྐྱེ་བ་མེད་པ་གང་ཡིན་པ་དེ་ནི་སྐྱོན་མེད་པ་ཡིན་ནོ། །སྐྱོན་མེད་པ་གང་ཡིན་པ་དེ་ནི་ངེས་པའི་དོན་ཡིན་ནོ། །ངེས་པའི་དོན་གང་ཡིན་པ་དེ་ནི་དོན་དམ་པ་ཡིན་ནོ། །དོན་དམ་པ་གང་ཡིན་པ་དེ་ནི་གང་ཟག་མེད་པའི་དོན་ཡིན་ནོ། །གང་ཟག་མེད་པའི་དོན་གང་ཡིན་པ་དེ་ནི་བརྗོད་དུ་མེད་པའི་དོན་ཡིན་ནོ། །བརྗོད་དུ་མེད་པའི་དོན་གང་ཡིན་པ་དེ་ནི་རྟེན་ཅིང་འབྲེལ་པར་འབྱུང་བའི་དོན་ཡིན་ནོ། །རྟེན་ཅིང་འབྲེལ་པར་འབྱུང་བའི་དོན་གང་ཡིན་པ་དེ་ནི་ཆོས་ཀྱི་དོན་ཡིན་ནོ། །ཆོས་ཀྱི་དོན་གང་ཡིན་པ་དེ་ནི་དེ་བཞིན་གཤེགས་པའི་དོན་ཡིན་ཏེ། དེའི་ཕྱིར་གང་གིས་རྟེན་ཅིང་འབྲེལ་པར་འབྱུང་བ་མཐོང་བ་དེས་ཆོས་མཐོང་ངོ་། །གང་གིས་ཆོས་མཐོང་བ་དེས་དེ་བཞིན་གཤེགས་པ་མཐོང་ངོ་ཞེས་གསུངས་ཏེ། ཇི་ལྟར་ཡོངས་སུ་ཚོལ་བ་ན་ཅི་ཡང་མི་མཐོང་བ་དེ་ལྟར་མཐོང་ངོ་། །འཇམ་དཔལ་དེ་ལ་ཅི་ཡང་ཞེས་བྱ་བ་གང་ཞེ་ན། འདི་ལྟ་སྟེ་སེམས་དང་དམིགས་པ་སྟེ། དེས་གང་གི་ཚེ་སེམས་དང་དམིགས་པ་ཡང་དག་པར་རྗེས་སུ་མི་མཐོང་བ་དེའི་ཚེ་ན་ཡང་དག་པར་མཐོང་བ་ཡིན་པས། དེ་བཞིན་གཤེགས་པས་ནི་ཆོས་དེ་དག་དེ་ལྟར་མཉམ་པ་ཉིད་ཀྱིས་མཉམ་པར་མངོན་པར་རྫོགས་པར་སངས་རྒྱས་སོ། །འཇམ་དཔལ་བྱང་ཆུབ་ནི་དག་པ་དང་། དྲི་མ་མེད་པ་དང་ཉོན་མོངས་པ་མེད་པ་ཡིན་ཏེ། འཇམ་དཔལ་དེ་ལ་དག་པ་ནི་གང་དྲི་མ་མེད་པ་ནི་གང་ཉོན་མོངས་པ་མེད་པ་ནི་གང་ཞེ་ན། འཇམ་དཔལ་སྟོང་པ་ཉིད་ནི་དག་པའོ། །མཚན་མ་མེད་པ་ནི་དྲི་མ་མེད་པའོ། །སྨོན་པ་མེད་པ་ནི་ཉོན་མོངས་པ་མེད་པའོ། །སྐྱེ་བ་མེད་པ་ནི་དག་པའོ། །མངོན་པར་འདུ་བྱ་བ་མེད་པ་ནི་དྲི་མ་མེད་པའོ། །འབྱུང་བ་མེད་པ་ནི་ཉོན་མོངས་པ་མེད་པའོ། །རང་བཞིན་ནི་དག་པའོ། །ཡོངས་སུ་དག་པ་ནི་དྲི་མ་མེད་པའོ། །འོད་གསལ་བ་ནི་ཉོན་མོངས་པ་མེད་པའོ། །སྤྲོས་པ་མེད་པ་ནི་དག་པའོ། །སྤྲོས་པ་དང་བྲལ་བ་ནི་དྲི་མ་མེད་པའོ། །སྤྲོས་པ་ཉེ་བར་ཞི་བ་ནི་ཉོན་མོངས་པ་མེད་པའོ།