དེ་ནས་དེའི་ཕ་མས་རྒྱལ་པོ་ཚངས་སྦྱིན་ལ་གསོལ་པ། རྒྱལ་པོ་ཆེན་པོ་གཞོན་ནུ་ལྗང་གུ་འདི་མདུན་ན་འདོན་དུ་དབང་བསྐུར་དུ་གསོལ། བདག་ཅག་དཀའ་ཐུབ་ཀྱི་ནགས་སུ་མཆི་ལགས་སོ། །དེ་ནས་རྒྱལ་པོ་ཚངས་སྦྱིན་གྱིས་ལྗང་གུ་ལ་སྨྲས་པ། ལྗང་གུ་ཁྱོད་མདུན་ན་འདོན་གྱིས་ཤིག་དེས་སྨྲས་པ། རྒྱལ་པོ་ཆེན་པོ་བདག་མདུན་ན་འདོན་པ་མི་འཚལ་ཏེ། བདག་ནི་རྒས་པ། ཉམ་ཆུང་བ། དབང་པོ་ཉམས་པ་རྣམས་ཀྱི་རིམ་གྲོ་འཚལ་བ་ལགས་སོ། །དེ་ནས་ལྗང་གུས་ཁྱིམ་ན་གནས་པ་དང་། མདུན་ན་འདོན་མཆིལ་མའི་ཐལ་བ་བཞིན་དུ་སྤངས་ནས་ཕ་མའི་གྲོགས་སུ་ནགས་ན་གནས་སོ། །དེ་ནང་པར་སྔར་ལངས་ནས་ཕ་དང་མ་གཉིས་ལ་སོ་ཤིང་དང་ཆུ་གཙང་མས་བསྙེན་བཀུར་བྱེད་དོ། །དེ་ནས་དེའི་འོག་ཏུ་ལྷ་ལ་མེའི་སྦྱིན་སྲེག་གི་མཆོད་སྦྱིན་བྱས་ནས་ཕྱིས་འབྲས་བུ་དང་རྩ་བའི་ཕྱིར་ནགས་ཁྲོད་དུ་འཇུག་གོ། །དེ་ནས་འབྲས་བུ་དང་། རྩ་བ་དང་། ཆུ་བསིལ་བ་ཁྱེར་ཏེ་ཕ་མ་ལ་བྱིན་ནས་དེའི་འོག་ཏུ་ཕྱོགས་གཅིག་ཏུ་སོང་ནས་བསམ་གཏན་ལ་བརྩོན་པར་གནས་ཏེ་རིམ་པ་དེ་ལྟ་བུས་དུས་འདའ་བར་བྱེད་དོ། །ཇི་ཙམ་ཉི་མ་གཞན་ཞིག་ལ་ནང་པར་སྔར་ལངས་ཏེ་ཕ་དང་མའི་རྐང་པ་གཉིས་ལ་ཕྱག་བྱས་ནས་གསོལ་ཏེ་རྨི་ལམ་དུ་ཡང་མཐོང་བ་རིག་པར་བྱེད་ཅིང་སྨྲས་པ། བདག་གི་གཡར་ལམ་སྦྲུལ་ནག་པོས། །བདག་ལུས་ཤིན་ཏུ་ཟོས་པ་དང་། །བདག་ནི་ཞགས་པ་ནག་པོ་ཡིས། །བཅིངས་ནས་ལྷོ་ཕྱོགས་ཁྲིད་པ་རྨིས། །གཡར་ལམ་འཇིགས་བྱེད་མཐོང་བདག་གི། །སྙིང་ལ་དོགས་པ་དེང་བདག་ལ། །བླ་མ་དང་བྲལ་ཤིན་ཏུ་ནི། །མི་བཟད་འབྱུང་བར་འགྱུར་སྙམ་བགྱིད། །ཇི་ཙམ་ན་ཕ་མ་དེ་གཉིས་ཀྱི་དབུགས་ཕྱུང་ནས་ཉི་མ་ལ་ཁ་བལྟས་ཏེ་འདུག་ནས་བདེན་པས་གསོལ་བ་བཏབ་སྟེ་རིལ་བ་ཁྱེར་ནས་ཆུ་ལེན་དུ་སོང་ངོ་། །དེའི་ཚེ་རྒྱལ་པོ་ཚངས་སྦྱིན་རི་དགས་འཆོར་དུ་ཆས་ཏེ་དཀའ་ཐུབ་ཀྱི་ནགས་དེར་ཞུགས་པ་དང་། རྒྱལ་པོ་དེ་སྒྲ་གྲགས་པར་ཕོག་པ་ཞིག་སྟེ། དེས་རི་དགས་ཀྱི་སྒྲ་ལྟ་བུ་ཞིག་ཐོས་ནས་གཞུ་རྣ་དྲུང་དུ་བཀང་སྟེ་མདའ་འཕངས་པས་ལྗང་གུའི་སྙིང་གར་ཕོག་པར་གྱུར་ཏོ།