བཞུགས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་ཁྱེད་ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་བསྲེལ་གྱི་ཚོགས་མ་ཞིག་པ་རྣམས་ལྟ་བར་འདོད་དམ། བཅོམ་ལྡན་འདས་ད་དེའི་དུས་ལ་བབ་ལགས་སོ། །བདེ་བར་གཤེགས་པ་ད་དེའི་དུས་ལ་བབ་ལགས་ཏེ། བཅོམ་ལྡན་འདས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་བསྲེལ་གྱི་ཚོགས་མ་ཞིག་པ་གང་དགེ་སློང་རྣམས་ལ་བསྟན་པ་མཐོང་ལགས་ན། དགེ་སློང་རྣམས་སེམས་མངོན་པར་དད་པར་འགྱུར་ལགས་སོ། །བཅོམ་ལྡན་འདས་ཀྱིས་འཇིག་རྟེན་པའི་ཐུགས་བསྐྱེད་པ་མཛད་དེ། ཆོས་ཉིད་ཀྱིས་གང་གི་ཚེ་སངས་རྒྱས་བཅོམ་ལྡན་འདས་རྣམས་ཀྱིས་འཇིག་རྟེན་པའི་ཐུགས་བསྐྱེད་པ་དེའི་ཚེ་སྲོག་ཆགས་གྲོག་སྦུར་རྣམས་ཀྱིས་ཀྱང་བཅོམ་ལྡན་འདས་ཀྱི་དགོངས་པ་སེམས་ཀྱིས་ཤེས་པར་འགྱུར་བས་ཀླུ་རྣམས་ཀྱིས་བསམས་པ། བཅོམ་ལྡན་འདས་ཀྱིས་ཅི་ཞིག་གི་ཕྱིར་འཇིག་རྟེན་པའི་ཐུགས་བསྐྱེད་པ་མཛད་སྙམ་ན། བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་བསྲེལ་གྱི་ཚོགས་མ་ཞིག་པ་གཟིགས་པར་བཞེད་པར་མཐོང་ནས། དེ་ནས་དེ་རྣམས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་བསྲེལ་གྱི་ཚོགས་མ་ཞིག་པར་ཕྱུང་བ་དང་། དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་རྟགས་ཟུང་ཤིག །ནུབ་པར་འགྱུར་རོ་ཞེས་པ་དང་ནུབ་བོ། །རྒྱལ་པོ་གསལ་རྒྱལ་གྱིས་བཅོམ་ལྡན་འདས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་གི་རིང་བསྲེལ་གྱི་ཚོགས་མ་ཞིག་པ། ཉན་ཐོས་རྣམས་ལ་བསྟན་ཏོ་ཞེས་ཐོས་སོ། །ཐོས་ནས་ཀྱང་ཡང་ངོ་མཚར་སྐྱེས་ནས་བཙུན་མོ་དང་། གཞོན་ནུ་དང་། བློན་པོ་དང་། ཁྲོམ་གྱི་རུ་པ་དང་། གྲོང་མི་དང་། ཡུལ་མི་རྣམས་དང་། ལྷན་ཅིག་ཆས་སོ། །དེ་བཞིན་དུ་ལུས་འཕགས་པོ་དང་། ཁྱིམ་བདག་མགོན་མེད་ཟས་སྦྱིན་དང་། དྲང་སྲོང་སྦྱིན་དང་། སོ་ཕག་མཁན་རྙིང་པ་དག་དང་། རི་དགས་འཛིན་གྱི་མ་ས་ག་དང་། སྲོག་ཆགས་བརྒྱ་སྟོང་ཕྲག་དུ་མ་ངོ་མཚར་སྐྱེས་ཏེ་ཆས་སོ། །