བདེན་པ་མཐོང་ནས་རང་གི་གནས་སུ་སོང་ངོ་། །ཞེས་བྱ་བའི་བར་གོང་མ་བཞིན་དུའོ། །དགེ་སློང་རྣམས་ཐེ་ཚོམ་སྐྱེས་ནས་ཐེ་ཚོམ་ཐམས་ཅད་གཅོད་པ་སངས་རྒྱས་བཅོམ་ལྡན་འདས་ལ་ཞུས་པ། བཙུན་པ་ཡི་དགས་འདི་རྣམས་ཀྱིས་ལས་ཅི་ཞིག་བགྱིས་ན་དེས་ན་ཡི་དགས་རྣམས་སུ་སྐྱེས་ལགས། ལས་ཅི་ཞིག་བགྱིས་ན་དེས་ན་ལྷ་རྣམས་སུ་སྐྱེས་ནས་བདེན་པ་མཐོང་བར་བགྱིས་ལགས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་འདི་དག་ཉིད་ཀྱིས་ལས་རྣམས་བྱས་ཤིང་བསགས་པ་ཚོགས་རྙེད་པ་དག་ནི་ཞེས་བྱ་བ་ནས། ལུས་ཅན་དག་ལ་འབྲས་བུར་འགྱུར། ཞེས་བྱ་བའི་བར་གོང་མ་བཞིན་དུའོ། །དགེ་སློང་དག་སྔོན་བྱུང་བ་བསྐལ་པ་བཟང་པོ་འདི་ཉིད་ལ་སྐྱེ་དགུའི་ཚེ་ལོ་ཉི་ཁྲི་ཐུབ་པ་ན་སྟོན་པ་འོད་སྲུང་ཞེས་བྱ་བ་འཇིག་རྟེན་དུ་བྱུང་སྟེ། ཞེས་བྱ་བ་ནས། དེ་བཱ་རཱ་ཎ་སཱིའི་གྲོང་ཁྱེར་ན་དྲང་སྲོང་སྨྲ་བ་རི་དགས་ཀྱི་ནགས་ན་ཉེ་བར་རྟེན་ཅིང་བཞུགས་སོ་ཞེས་བྱ་བའི་བར་གོང་མ་བཞིན་དུའོ། །དེའི་ཉན་ཐོས་རྣམས་ཀྱིས་དད་པ་ལས་བསླངས་ནས་སངས་རྒྱས་དང་། ཆོས་དང་། དགེ་འདུན་ལ་བྱ་བ་བྱེད་དོ། །གང་གི་ཚེ་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་འོད་སྲུང་གི་བསྟན་པ་རྒྱས་པར་མ་གྱུར་པ་དེའི་ཚེ་དད་པ་འདྲི་བའི་དགེ་སློང་ཡང་ཉུང་བར་གྱུར་ཏོ། །གང་གི་ཚེ་རྒྱས་པར་གྱུར་པ་དེའི་ཚེ་དད་པ་འདྲི་བའི་དགེ་སློང་ཡང་མང་བར་གྱུར་ཏོ། །ཇི་ཙམ་ན་འདུན་ཁང་ཞིག་ན་དགེ་བསྙེན་ལྔ་བརྒྱ་བྱ་བ་འགའ་ཞིག་གི་ཕྱིར་ལྷགས་ཤིང་འདུས་པར་གྱུར་པ་དང་། དད་པ་འདྲི་བའི་དགེ་སློང་རབ་ཏུ་མང་པོ་དག་དེ་རྣམས་ཀྱི་དྲུང་དུ་སོང་ནས་སྦྱིན་དུ་གཞུག་པར་འདོད་པ་ན། དེ་རྣམས་ཀྱིས་ཀུན་ནས་དཀྲིས་པ་དྲག་པོས་ངག་རྩུབ་པའི་ལས་ཕྱུང་བ། འོད་སྲུང་གི་དགེ་སྦྱོང་འདི་རྣམས་ནི་ཡི་དགས་རྣམས་སུ་སྐྱེས་པ་བཞིན་རྟག་ཏུ་ལག་པ་ཟེད་པར་བྱེད་དོ་ཞེས་སྨྲས་སོ། །དགེ་སློང་དག་ཇི་སྙམ་དུ་སེམས། དགེ་བསྙེན་ལྔ་བརྒྱ་པོ་གང་དག་ཡིན་པ་དེ་དག་ནི་ཡི་དགས་ལྔ་བརྒྱ་པོ་འདི་དག་ཉིད་ཡིན་ཏེ། གང་ཡང་འདི་རྣམས་ཀྱིས་ཡང་དག་པར་རྫོགས་པའི་སངས་རྒྱས་འོད་སྲུང་གི་ཉན་ཐོས་རྣམས་ལ་ཡི་དགས་ཀྱི་ཚིག་སྨྲས་པའི་ལས་དེའི་རྣམ་པར་སྨིན་པས་ཚེ་རབས་ལྔ་བརྒྱར་ཡི་དགས་རྣམས་སུ་སྐྱེས་པར་གྱུར་ཏེ། ད་ལྟའི་བར་དུ་ཡང་ཡི་དགས་རྣམས་སུ་སྐྱེས་པ་ཡིན་ནོ།