།དེ་སངས་རྒྱས་ལ་སོགས་པ་དགེ་སློང་གི་དགེ་འདུན་ལ་སེམས་གདུག་པས་ཚིག་རྩུབ་པོ་ཕྱུང་ནས་མཉན་ཡོད་ནས་བྱུང་སྟེ་ཤིང་དྲུང་ཞིག་ཏུ་ཉལ་བ་དང་། ཤིང་རྟས་འཁྱམ་པས་དེའི་མགོ་བཅད་པར་གྱུར་ཏོ། །ངས་དེ་ལས་དགོངས་ནས། ཆོས་རྣམས་སྔོན་དུ་ཡིད་འགྲོ་ཡིད་གཙོ་ཡིན། ཞེས་བྱ་བ་ནས་སྔ་མ་བཞིན་དུ། འཐོབ་འགྱུར་འཁོར་ལོ་འཕྱན་པས་མགོ་བོ་བཅད། །ཅེས་བྱ་བའི་བར་གསུངས་སོ། །དེའི་ཚེ་མཉན་ཡོད་ན་ཚོང་དཔོན་ཞིག་བུ་མེད་པར་ཤིའོ། །མཉན་ཡོད་ཀྱི་བྲམ་ཟེ་དང་ཁྱིམ་བདག་རྣམས་འདུས་ནས་སྨྲས་པ། སུ་ཞིག་ཚོང་དཔོན་དུ་གཞུག །ཁ་ཅིག་གིས་སྨྲས་པ། སུ་བསོད་ནམས་ཀྱི་མཐུ་ཆེན་པོ་དང་ལྡན་པའོ། །ཇི་ལྟར་ཤེས་པར་བྱ། བརྟག་མོད་ཅེས་དེ་ནས་དེ་རྣམས་བརྟག་པར་བརྩམས་པ་ལས། དེ་རྣམས་ཀྱིས་རྒྱལ་རིགས་ཀྱི་ཁྱེའུ་དེ་ཤིང་གི་གྲིབ་མ་ལ་ཉལ་བ་ན་ཤིང་གཞན་རྣམས་ཀྱི་གྲིབ་མ་ཡོལ་བར་གཞོལ། ཡོལ་བར་འབབ། ཡོལ་བར་བབ་ན། ཤིང་དེའི་གྲིབ་མ་ནི་ཁྱེའུ་དེའི་ལུས་ལས་མ་ཡོལ་བར་མཐོང་ནས། དེ་རྣམས་ཀྱིས་དེ་བསླང་སྟེ་ཚོང་དཔོན་དུ་དབང་བསྐུར་བ་དང་དེ་འདི་སྙམ་དུ་སེམས་ཏེ། བདག་ལ་དཔལ་གྱི་འབྱོར་པའི་སྐལ་བ་ཅི་ཡོད་པ་དེ་དག་ཐམས་ཅད་ནི་སངས་རྒྱས་བཅོམ་ལྡན་འདས་ལ་བརྟེན་ཏེ་ཡིན་གྱིས། མ་ལ་བདག་གིས་བཅོམ་ལྡན་འདས་ཉན་ཐོས་ཀྱི་དགེ་འདུན་དང་ཐབས་ཅིག་ཏུ་གདུགས་ཚོད་ལ་སྤྱན་དྲང་ངོ་སྙམ་ནས། དེ་བཅོམ་ལྡན་འདས་གང་ན་བ་དེར་སོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས། བཅོམ་ལྡན་འདས་ཀྱིས་ཚོང་དཔོན་དེ་ལ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་མཛད། ཡང་དག་པར་འཛིན་དུ་འཇུག་པར་མཛད། ཡང་དག་པར་གཟེངས་སྟོད་པར་མཛད། ཡང་དག་པར་རབ་ཏུ་དགའ་བར་མཛད་དེ། རྣམ་གྲངས་དུ་མར་ཆོས་དང་ལྡན་པའི་གཏམ་གྱིས་ཡང་དག་པར་བསྟན། ཡང་དག་པར་འཛིན་དུ་བཅུག །ཡང་དག་པར་གཟེངས་བསྟོད། ཡང་དག་པར་རབ་ཏུ་དགའ་བར་མཛད་ནས་ཅང་མི་གསུང་ངོ་། །དེ་ནས་ཚོང་དཔོན་དེ་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས།