དེ་ཟླ་བ་བརྒྱད་དམ་དགུ་འདས་པ་དང་ཁྱེའུ་གཟུགས་བཟང་བ། བལྟ་ན་སྡུག་པ། མཛེས་པ། པགས་པའི་མདོག་གསེར་འདྲ་བ་མགོ་གདུགས་ལྟ་བུ། ལག་པ་རིང་བ། འཕྲལ་བའི་དབྱེས་ཆེ་བ། སྨིན་མ་འཇར་བ་སྣའི་གཟངས་མཐོ་བ། ཡན་ལག་དང་ཉིང་ལག་ཐམས་ཅད་དང་ལྡན་པ་ཞིག་བཙས་སོ། །ཇི་ཙམ་ན་ཆེན་པོར་གྱུར་པ་དང་བཙུན་མོ་དེ་དག་ཐམས་ཅད་ཁྱེའུ་དེ་ལ་བུའི་སྡུག་པ་སྐྱེས་སོ།། །།འདུལ་བ་གཞི། བམ་པོ་ཉི་ཤུ་བདུན་པ། དེ་ནས་དུས་གཞན་ཞིག་ན་རྒྱལ་པོ་ལེགས་མཐོང་ཆེན་པོ་ཤར་གྱི་ལུས་འཕགས་ཀྱི་གླིང་ནས་རིན་པོ་ཆེ་སྣ་བདུན་གྱིས་སྣ་དྲངས་ཤིང་ཁམས་ཀྱི་རྒྱལ་ཕྲན་སྟོང་གིས་ཡོངས་སུ་བསྐོར་ཏེ་བུ་སྟོང་དུ་གཅིག་གིས་མ་ཚང་བས་ཟླ་བ་ཁམ་པ་ལྟ་བུར་བསྐོར་ནས། གཟི་བརྗིད་ཉི་མའི་འོད་ཟེར་སྟོང་བས་ལྷག་པར་སྤ་ཞིང་འོང་བ་གཞོན་ནུ་ཁང་བཟངས་ཀྱི་སྟེང་ན་འདུག་པ་དེས་མཐོང་ནས། དེས་མ་ལ་དྲིས་པ། ཡུམ་མཆི་བ་ཕ་བི་སུ་ལགས། བུ་ཁྱོད་ཀྱི་ཡབ་རྒྱལ་པོ་ལེགས་མཐོང་ཆེན་པོ་ཡིན་ནོ། །ཡུམ་དེ་འདས་ན་བདག་རྒྱལ་པོར་འགྱུར་རམ། བུ་རྒྱལ་པོ་དེའི་སྲས་སྟོང་དུ་གཅིག་གིས་མ་ཚང་བ་ཞིག་ཡོད་པ་དེ་དག་ཐམས་ཅད་ཀྱི་ཕུ་བོ་གང་ཡིན་པ་དེ་དེ་འདས་ན་རྒྱལ་པོར་འགྱུར་ན་ཁྱོད་ནི་ཐམས་ཅད་ཀྱི་ནུ་བོ་ཡིན་ནོ། །དེས་སྨྲས་པ། ཡུམ་གལ་ཏེ་དེ་འདས་ན་བདག་རྒྱལ་པོར་མི་འགྱུར་ན་གནང་བར་མཛོད་ཅིག་དང་། བདག་དད་པ་ཡང་དག་པ་ཁོ་ནས་ཁྱིམ་ནས་ཁྱིམ་མེད་པར་རབ་ཏུ་འབྱུང་བར་བགྱིའོ། །བཙུན་མོ་དེ་དག་ཐམས་ཅད་ཀྱིས་སྨྲས་པ། བུ་ཁྱོད་ལ་བདག་ཅག་གིས་བུའི་སྡུག་པ་ཉམས་སུ་མྱོང་གིས་དེ་ལྟར་མ་བྱེད་ཅིག །ཡུམ་གདོན་མི་འཚལ་བར་རབ་ཏུ་འབྱུང་བར་བགྱིའོ། །དེ་དག་གིས་དེ་གདོན་མི་ཟ་བར་གལ་གྱིས་འཆུ་བར་ཤེས་ནས་སྨྲས་པ། བུ་གལ་ཏེ་དེ་ལྟ་ན་དམ་ཞིག་བཅས་ནས་གནང་བར་བྱ་སྟེ། གང་ཡང་ཁྱོད་ཀྱིས་ཡོན་ཏན་གྱི་ཚོགས་ཅུང་ཟད་རྟོགས་ན་དེ་ཁྱོད་ཀྱིས་བདག་ཅག་ལ་སྨྲོས་ཤིག །དེ་བཞིན་དུ་བགྱིའོ། །དེ་དེ་དག་གིས་གནང་ནས་དེས་མཐའ་གཅིག་ཏུ་སོང་སྟེ།