བདག་འདི་དག་གི་ནང་དུ་རབ་ཏུ་བྱུང་ན་འདི་དག་བདག་ལ་སྐྱེས་པའི་བྱ་བ་བྱེད་པར་འགྱུར་ཞིང་བདག་ཀྱང་འདི་དག་ལ་བུད་མེད་ཀྱི་བྱ་བ་བྱེད་པར་འགྱུར་རོ་སྙམ་ནས། དེ་དགེ་སློང་གི་གན་དུ་སོང་སྟེ་སྨྲས་པ། འཕགས་པ་བདག་རབ་ཏུ་འབྱུང་བར་འཚལ་ལོ། །དེས་དེ་ལ་སྨྲས་པ། ཁྱོད་ཕ་མས་གནང་ངམ། དེས་སྨྲས་པ། མ་གནང་ངོ་། །སོང་ལ་ཕ་མ་ལ་གསོལ་ཅིག །དེ་ཕ་མའི་གན་དུ་སོང་སྟེ་སྨྲས་པ། ཡབ་ཡུམ་བདག་རབ་ཏུ་འབྱུང་བར་འཚལ་ལོ། །དེ་གཉིས་དེས་ཡོངས་སུ་གདུངས་པས་བསམས་པ། བདག་ཅག་འདི་དང་བྲལ་བར་བྱས་རབ་ཏུ་འབྱུང་ལ་རག་གོ་སྙམ་ནས། དེ་གཉིས་ཀྱིས་དེ་ལ་སྨྲས་པ། མ་ནིང་གནང་ངོ་། །དེ་དགེ་སློང་གི་ནང་དུ་སོང་སྟེ་སྨྲས་པ། འཕགས་པ་བདག་ཕ་མས་གནང་གིས་རབ་ཏུ་དབྱུང་དུ་གསོལ། དེས་དེ་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་པ་དང་། དགེ་སློང་རྣམས་ཀྱི་མདུན་དུ་མཚན་མ་སྟོན་པར་བྱེད་ནས། དེ་དག་གིས་དེ་ལ་སྨྲས་པ། ཁྱོད་མ་ནིང་ཡིན་ནམ་ཅི། དེས་སྨྲས་པ། ཡིན་ནོ་ཞེས་ཟེར་བའི་སྐབས་དེ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ་དང་། དེ་ན་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་གང་ཟག་མ་ནིང་ནི་ཆོས་འདུལ་བ་འདི་ལ་མི་སྐྱེ་བའི་ཆོས་ཅན་ཡིན་པས། དགེ་སློང་དག་ཁྱེད་ཀྱིས་གང་ཟག་མ་ནིང་ཆོས་འདུལ་བ་འདི་ལས་བསྙིལ་བར་བྱའོ། །འགའ་ཞིག་གི་གན་དུ་རབ་ཏུ་འབྱུང་བར་འདོད་པ་འོངས་ན། དེས་དེ་ལ་མ་ནིང་མ་ཡིན་ནམ་ཞེས་དྲི་བར་བྱའོ། །མ་དྲིས་པར་རབ་ཏུ་འབྱིན་པར་བྱེད་ན་འགལ་ཚབས་ཅན་དུ་འགྱུར་རོ། །དགེ་སློང་དག་མ་ནིང་ནི་ལྔ་པོ་འདི་དག་ཡིན་ཏེ། ལྔ་གང་ཞེ་ན། སྐྱེས་ནས་མ་ནིང་དང་། ཟླ་བ་ཕྱེད་པའི་མ་ནིང་དང་། འཁྱུད་ནས་ལྡང་བའི་མ་ནིང་དང་། ཕྲག་དོག་ཅན་གྱི་མ་ནིང་དང་། ཉམས་པའི་མ་ནིང་ངོ་། །དེ་ལ་སྐྱེས་ནས་མ་ནིང་གང་ཞེ་ན། གང་སྐྱེས་ནས་བུད་མེད་ཀྱང་མ་ཡིན་སྐྱེས་པ་ཡང་མ་ཡིན་པའོ། །ཟླ་བ་ཕྱེད་པའི་མ་ནིང་གང་ཞེ་ན། གང་ཟླ་བ་ཕྱེད་ནི་བུད་མེད་ཟླ་བ་ཕྱེད་ནི་སྐྱེས་པར་འགྱུར་བའོ། །འཁྱུད་ནས་ལྡང་བའི་མ་ནིང་གང་ཞེ་ན། གང་ལ་གཞན་དག་གིས་འཁྱུད་ན་དབང་པོ་འབྱུང་བར་འགྱུར་བའོ། །ཕྲག་དོག་ཅན་གྱི་མ་ནིང་གང་ཞེ་ན། གང་ལ་གཞན་དག་རྩོལ་བ་མཐོང་ན་དབང་པོ་འབྱུང་བར་འགྱུར་བའོ།