Degé Kangyur volume 1, F.103.b

ཡང་དག་པར་ལྡན་པ་ལྷོགས་ཤིག །​གཉིས་པ་ལ་སྨྲས་པ། ཁྱོད་ཀྱིས་ནི་བར་མ་ལྷོགས་ཤིག །​གསུམ་པ་ལ་སྨྲས་པ། ཁྱོད་ཀྱིས་ནི་རིང་པོ་ལྷོགས་ཤིག །​ཁོ་བོས་ཀྱང་གཅིག་ལས་འཕྲོས་པའི་ལུང་བརྗོད་པའི་སྐབས་དེ་དག་ཉིད་ལ་གསལ་བར་བྱའོ། །​དེ་དག་གིས་བཀླག་པར་བརྩམས་ནས་དེ་ན་གཅིག་ནི་མིག་བཙུམས་ཏེ་ལུང་ནོད་པར་བྱེད་དོ། །​གཉིས་པ་ནི་རྒྱབ་ཀྱིས་ཕྱོགས་ཏེ་ལུང་ནོད་པར་བྱེད་དོ། །​གསུམ་པ་ནི་ཐག་རིང་པོར་འདུག་སྟེ་ལུང་ནོད་པར་བྱེད་དོ། །​དེ་དག་གི་ནང་ནས་སྤྲུལ་པ་དེ་ཉིད་ནི་སྔོན་གྱི་བག་ཆགས་ཀྱི་ཁྱད་པར་གྱིས་གུས་པ་དང་བཅས་པ་དང་། ཞེ་ས་དང་བཅས་པ་དང་། འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་པས་དེ་ནང་བར་སྔར་ལངས་ཏེ། འཕགས་པ་བཞེངས་ལ་ཚེམས་ཤིང་འོར་ཅིག །​བཅོམ་ལྡན་འདས་ཀྱི་དཀྱིལ་འཁོར་དང་མཆོད་རྟེན་ལ་ཕྱག་མཛོད་ཅིག །​བཤོས་གསོལ་ཅིག །​གཟིམས་མལ་ཤོམས་ཤིག་ཅེས་སྨྲ་བར་བྱེད་དོ། །​ཇི་ཙམ་ན་དེ་ཐམས་ཅད་ཀྱིས་རིམ་གྱིས་ལུང་རྣམས་བཀླགས་པ་དང་། སྤྲུལ་པ་དེས་སྨྲས་པ། འཕགས་པ་འདི་དག་གིས་ལུང་རྣམས་བཀླགས་ན་ཅི་འཛིན་ཏམ་འོན་ཏེ་མི་འཛིན། དེས་སྨྲས་པ། འདི་དག་དྲན་པ་དང་ལྡན་པས་འཛིན་པར་ནི་འགྱུར་ན་འདི་ལྟར་འདི་དག་ལ་ཉེས་པ་ཡོད་དོ། །​དེས་སྨྲས་པ། འཕགས་པ་ནོངས་པ་ཅི་མཆིས། འདི་དག་ཐམས་ཅད་གུས་པ་མེད་པ་དང་ཞེ་ས་མེད་པ་ཡིན་ཏེ། རེ་ཞིག་གཅིག་ནི་མིག་བཙུམས་ཏེ་ལུང་ནོད་པར་བྱེད། གཉིས་པ་ནི་རྒྱབ་ཀྱིས་ཕྱོགས་ཏེ་ལུང་ནོད་པར་བྱེད། གསུམ་པ་ནི་ཐག་རིང་པོར་འདུག་སྟེ་ལུང་ནོད་པར་བྱེད་དོ། །​ཁྱོད་འབའ་ཞིག་གུས་པ་དང་བཅས་པ་དང་། ཞེ་ས་དང་བཅས་པ་དང་འཕྲལ་གྱི་བྱ་བ་ཐམས་ཅད་ལ་ཐོག་མར་འགྲོ་བ་ཡིན་ནོ། །​དེས་སྨྲས་པ། འཕགས་པ་དེ་དག་ནི་གུས་པ་མ་མཆིས་པ་དང་། ཞེས་མ་མཆིས་པ་མ་ལགས་ཏེ། རེ་ཞིག་མིག་བཙུམས་ཏེ་ལུང་ནོད་པ་གང་ལགས་པ་ནི་མིག་གདུག་པ་ལགས་སོ། །​རྒྱབ་ཀྱིས་ཕྱོགས་ཏེ་ལུང་ནོད་པ་གང་ལགས་པ་ནི་དབུགས་གདུག་པ་ལགས་སོ། །​ཐག་རིང་པོར་མཆིས་



The English translation of this folio by 84000 Translating the words of the Buddha can be found at:
https://read.84000.co/translation/toh1-1.html?part=UT22084-001-001-29245#UT22084-001-001-29245